ဟလာလဟ်သည်အမျိုးသမီးအခွင့်အရေ || Myanmar Bayan

ဟလာလဟ်သည်အမျိုးသမီးအခွင့်အရေး

ရေးသူ မုဖ်သီမုဟမ္မဒ်အိဒ်ရီးစ်ဆွာဟိဗ် (Idris Nct)
(အလ်မုဖီးဒ်က ပြန်လည်ဖော်ပြခြင်း ဖြစ်၏)

ဟလာလဟ်သည် အမျိုးသမီးအခွင့်အရေး ဖြစ်သည်။ Facebook ပေါ်မှာ သာသနာ့စာပေတွေ မရေးဖြစ်တာ ကြာပေမယ့် ဒီ (ဟလာလဟ်) ကိစ္စအပေါ်မှာ အနည်းငယ် စိတ်ထဲကနေ ရေးချင်မိလာတယ်။ တကယ်တော့ ဒီဟလာလဟ် ကိစ္စရပ်ပေါ် မသမာသူတွေရဲ့ သားပုပ်လေလွင့် အမုန်းတရားဝါဒီကို အခြေခံပြီး တင်ပြမှုတွေကြောင့် ဟလာလဟ် ကိစ္စအပေါ် အခြေခံ၍ မုရ်သဒ် ဖြစ်မှု၊ စိတ်ကြိုက်လမ်းစဉ် ပြောင်းလဲလာမှုတွေ မျက်ဝါးထင်ထင် မြင်နေရသည်ကို အားလုံးအသိပင်ဖြစ်သည်။ သို့ပါသော်ကြောင့် ဟလာလဟ် ကိစ္စကို မတင်ပြမီ ဟလာလဟ်ဟူသည့် အမိန့်အား ပြဌာန်းရခြင်း၏ အကြောင်းအရင်းကို အနည်းငယ် တင်ပြပါမည်။

အစ္စလာမ် မထွန်းကားမီ အာရဗ်တို့၏ဓလေ့မှာ မိမိဇနီးကြင်ယာအား အကန့်အသတ်မဲ့ သွလားက်ပေး ကွာရှင်းမှု ပြုကြ၍ ခင်ပွန်းက ပြန်ပေါင်းလိုသောအခါ နုနယ်သည့် ဖန်သားပြင်ပိုင်ရှင် အမျိုးသမီးအား စကားချိုသွေး၍ ပြန်ပေါင်းကြသည်။ အမျိုးသမီးတို့၏ ဗီဇမှာ နုနယ်ပျော့ပြောင်းခြင်းကို အခြေခံထားသောကြောင့် ခင်ပွန်းက အနည်းငယ်ချော့သည့် အခါဝယ် စိတ်ပြောင်းသွားတတ်ကြသည်။ တဖန် နောင်တွင် မပြောပလောက်သည့် ကိစ္စရပ်အပေါ် ခင်ပွန်းက စိတ်မကျေမနပ်ဖြစ်လျှင် သွလားက်ပေး ကွားရှင်မှု ပြုလိုက်ပြန်သည်။
ထိုသို့ အလိုမကျ၍ကွာရှင်းလိုက် အလိုရှိလျှင်ပြန်ပေါင်းလိုက် လုပ်၍ ဇနီးအား လက်ခုပ်ထဲရှိ ရေပမာ လုပ်ချင်တိုင်း လုပ်လာကြတော့သည်။ မြင့်မြတ်တော်မူသော အလ္လာဟ်အရှင်မြတ်သည် အမျိုးသမီးတို့၏ အခွင့်အရေးကို ထောက်ရှု၍ အမျိုးသား(ခင်ပွန်း) တို့အတွက် သွလားက်ပေး ကွာရှင်းမှုအကြိမ်အရေကို ကန့်သတ်လိုက်သည်။ ထိုအမိန့် အာယသ်တော်မှာ فان طلقها فلا تحل له حتي تنكح زوجا غيره. အဓိပ္ပါယ် သွလာကေ့ရဂ်ျအီ (သွလားက် နှစ်ကြိမ်) ပေးပြီးနောက် အကယ်၍ လင်ယောက်ျားက ထိုဇနီးအား ထပ်မံ၍ သွလားက်ပေး ကွာရှင်းခဲ့သည် ရှိသော် (တနည်း တတိယသွလားက် ပေး၍ (သွလားက်သုံးကြိမ်)အရေအတွက်သို့ ရောက်လျှင်) ၎င်းဇနီးမိန်းမသည် အခြားယောက်ျားတစ်ဦးဦးနှင့် ထိမ်းမြား၍ ဆက်ဆံပေါင်းသင်းခြင်း မပြုသမျှကာလပတ်လုံး ထို (ပထမခင်ပွန်း) ယောက်ျားအဖို့ တရားဝင်ဇနီး ဖြစ်မည်မဟုတ်ပေ။
ထို့ကြောင့် ၎င်းအာယသ်တော်နှင့် အစ္စလာမ်၏ အခြားပြဌာန်းမှုများကို လေ့လာသုံးသပ်လျှင် ထိုသို့ ဟလာလဟ် မိမိလင်ယောက်ျားနှင့် ပြန်ပေါင်းဖို့တစ်ပါးသူနှင့် ထိမ်းမြားရမည်မှာ စည်းကမ်းမဲ့သွလားက်ပေး ကွာရှင်းသည့် လင်ယောက်ျားအား အပြစ်ပေးခြင်း ဖြစ်သည်။
(အထက်ပါ အမိန့်တွင် ကွာရှင်းမှု သုံးကြိမ်ဖြစ်ရသည့် အမျိုးသမီးအား လွတ်လပ်ခွင့် အပြည့်ပေးလိုက်ခြင်း ဖြစ်သည်။ အမျိုးသမီးတွင် ရွေးချယ်ပိုင်ခွင့် အပြည့်အဝ ရရှိသွားသည်။ သူက အခြားအမျိုးသားတဦးနှင့် အိမ်ထောင်ပြုပြီး ထိုခင်ပွန်း သေဆုံးပြီး စောင့်ဆိုင်းကာလပြည့်ပြီးမှ သို့မဟုတ် ထိုခင်ပွန်းက ကွာရှင်းပြီး စောင့်ဆိုင်းကာလ ပြည့်ပြီးမှ ကွာရှင်းမှု သုံးကြိမ်ပြုထားသည့် ပထမခင်ပွန်းအတွက် အမျိုးသမီးက ဟလာလ် (ထိမ်းမြားခွင့်ရသူ) ဖြစ်သွားမည်။ ထိုသို့ အမျိုးသမီးက သူ့သဘောဆန္ဒနှင့်အညီ ဒုတိယခင်ပွန်းကို ရွေးချယ်ထိမ်းမြားပြီး ထိုခင်ပွန်းသေဆုံးခြင်း၊ သို့မဟုတ် ကွာရှင်းသွားခြင်း အခြေအနေကို အစ္စလာမ့်ဥပဒေတွင် ဟလာလဟ်ဟုခေါ်သည်။ ဤနေရာတွင် အမျိုးသမီးအနေနှင့် ကြိုက်သလို ရွေးချယ်ခွင့်ရရန် အစ္စလာမ့်ဥပဒေက အပြည့်အဝ အကာအကွယ်ပေးထားသည်။ ကွာရှင်းမှု သုံးကြိမ်ပေးလိုက်သည့် ခင်ပွန်းတဦးက စတုတ္ထအကြိမ်မြောက် ဇနီးဟောင်းအား လက်ထပ်ချင်တိုင်း လက်ထပ်ခွင့် မရတော့ပါ။ ဇနီးအမျိုးသမီး၏ ဆန္ဒကို ဦးစားပေးထားသည့် အစ္စလာမ့်ဥပဒေကြောင့် ခင်ပွန်းအမျိုးသားက သူ့ဇနီးဟောင်း၏ ရွေးချယ်မှုကို စောင့်မျှော်ရန်သာ ရှိတော့သည်။ အမျိုးသမီးအနေနှင့် အိမ်ထောင် ထပ်မပြုဘဲ နေချင်လည်း နေနိုင်သည်။ နောက်ခင်ပွန်းမယူဘဲ သူ့ဘ၀ကို သူ့ဘာသာ ရပ်တည်ချင်လည်း ရပ်တည်နိုင်သည်။ နောက်ခင်ပွန်းယူရာတွင်လည်း နောက်ခင်ပွန်းယူခြင်းဖြစ်လို့ ရရာလူကို အတင်းယူရမည်ဟု အမိန့်မပေးထားသလို ဟလာလဟ် လုပ်ကိုလုပ်ရမည်ဟု အစ္စလာမ့်ပြဌာန်းချက်တွင် တလုံးတပါဒမျှ မပါဝင်ပါ။ (ဟလာလဟ်ကို စွပ်စွဲနေသူများ ထိုအချက်ကို သတိပြုပါ။) အမျိုးသမီးတယောက်တွင် ခင်ပွန်းအဆက် ဘယ်နှစ်ဆက်ပင် ရှိခဲ့သည်ဖြစ်စေ သူထိမ်းမြားဖို့ ကြုံကြိုက်လာတိုင်း အပျိုတဦးထိမ်းမြားသည့်နည်းတူ ထိုအမျိုးသမီးအား သဘောတူ၊ မတူ မေးမြန်းရ၏။ မွတ်စ်လင်မ်နှစ်ဦးက သက်သေနှစ်ဦး အဖြစ် ပါဝင်ရ၏။ ခန်း၀င်ကြေး ပေးရ၏။ အိမ်ထောင်ဆက် ဘယ်နှစ်ဆက်ပင် ရှိခဲ့သည့်အမျိုးသမီးဖြစ်ပါစေ ယခုလက်ထပ်သည့် အမျိုးသားက သူ့၏ စား၊ ၀တ်၊ နေရေး အားလုံးကို တာ၀န်ယူနိုင်သူ ဖြစ်ရမည်။ ထိုအမိန့်များသည် ကွာရှင်းမှုသုံးကြိမ်ပြုပြီးသူနှင့် အပျိုတဦး တန်းတူပင် ဖြစ်၏။ ယခု သွလားက် သုံးကြိမ်ရထားသည့် အမျိုးသမီးသည် သူကြိုက်နှစ်သက်ပြီး သူ့ကိုလည်း ကြိုက်နှစ်သက်သည့် အမျိုးသားနှင့် ထိမ်းမြားလက်ထပ်ပြီး အိမ်ထောင်တခု တည်ဆောက်လိုက်သည်။ ဤသို့ နေထိုင်ခြင်းသည် ထိုအမျိုးသမီး၏ ဘ၀အတွက် ရာသက်ပန်လည်း ဖြစ်ခွင့်ရှိသည်။ အခုယူ၊ အခုကွဲ၊ အခုပြန်ယူ စသည့်လုပ်ရပ်မျိုးအား အစ္စလာမ်က စေခိုင်းထားခြင်းမဟုတ်သလို ထိုပုံစံအသွင်ဆောင်သည့် ပြောဆိုချက်များသည်လည်း အစ္စလာမ့်ဥပဒေကို စွပ်စွဲနေခြင်းသာ ဖြစ်၏။ ထိုသို့နေထိုင်ပြီးနောက် အကြောင်းကြောင်းကြောင့် ထိုအမျိုးသမီး၏ ခင်ပွန်း သေသွားမည်၊ သို့မဟုတ် ကွာရှင်းမှု ဖြစ်သွားမည်။ ထိုအခါတွင် အမျိုးသမီးအနေဖြင့် စောင့်ဆိုင်းကာလ ပြည့်သည်အထိ တစ်ကိုယ်ရေတစ်ကာယ နေထိုင်ရဦးမည်။ စောင့်ဆိုင်းကာလပြီးနောက်တွင် အမျိုးသမီးအတွက် အိုးသစ်အိမ်သစ် အိမ်ထောင်သစ် တဖန်ပြန်တည်ခွင့် ရရှိပြီ ဖြစ်၏။ သူ့အတွက် နားခိုရာ ရင်ခွင်တစုံ၊ သူ့အတွက် အကာအကွယ်ပေးမည် လက်တစုံကို လက်ထပ်ခွင့် ရပြန်ပြီ ဖြစ်၏။ ယခုအခါတွင်မူ တချိန်တခါက သူ့အား ကွာရှင်းမှုသုံးကြိမ်ပြုခဲ့သည့် ခင်ပွန်းဟောင်းသည် ဤအမျိုးသမီးအတွက် တခြားထိမ်းမြားခွင့် ရှိသူများနည်းတူ ဟလာလ် ပြန်ဖြစ်ပေပြီ။ ယခု ခင်ပွန်းဟောင်းက ပြန်လာတောင်း၍ လက်ထပ်လိုလျှင် လက်ထပ်ခွင့် ပြန်ရှိပြီဖြစ်သည်။ အကယ်၍ အမျိုးသမီးက ကွာရှင်းမှု သုံးကြိမ်ပြုသူ ခင်ပွန်းဟောင်းအား မရွေးချယ် လက်မထပ်လိုပါကလည်း အပြစ်မရှိသလို အပြစ်တင် ရှုံချစရာလည်း မရှိပါ။ ယူမယ်၊ မယူဘူးဟူသည့် အိမ်ထောင်ရေး၏ အဓိက သော့တန်အား အစ္စလာမ့်ရှရီအသ်က မိန်းမသားတို့လက်ထဲသို့ အပြည့်အ၀ ထည့်ပေးထားသည်။ (ဤသည်ကို မြင်အောင် မကြည့်တတ်ဘဲ အစ္စလာမ့်ရှရီအသ်ကိုပင် အမျိုးသမီးအခွင့်အရေး ချုပ်ကိုင်သည့် ဥပဒေ၊ အလ္လာဟ်အချစ်တော်ဖြစ်ရန် ကြိုးစားခဲ့ပြီး အလ္လာဟ်သတ်မှတ်သည့် ဥပဒေအား သာမန်လူသားတိုင်း နားလည်စေရန် ကြိုးပမ်းခဲ့သည့် ပညာရှင်၊ သူတော်စင်များအား စွတ်စွဲနေသူများသည် ပညာမျက်စိမရှိသည့် အသိဥာဏ်ငကန်းများပင် ဖြစ်သည်ဟု မှတ်ချက်ချပါသည်။) အမျိုးသမီးအနေနှင့် ကွာရှင်းမှု သုံးကြိမ်ပြုဖူးသူ ခင်ပွန်းကို ရွေးချယ်ခွင့် ရှိသလို တခြားသူကိုလည်း ရွေးချယ်ခွင့် ရှိ်သည်။ ဤသို့ ခင်ပွန်းက ဇနီးအား ကွာရှင်းမ ှုသုံးကြိမ်ပြုပြီးနောက် အမျိုးသမီးက သူ့ဘ၀သူ ရွေးချယ်ရပ်တည်၍ အိမ်ထောင်ပြုခြင်း၊ စောင့်ဆိုင်းကာလ ပြည့်အောင် နေထိုင်ခြင်း တို့အား အစ္စလာမ့်ရှရီအသ်တွင် ဟလာလာဟ်ဟု ခေါ်သည်။ ထိုဟလာလဟ်သည် ခင်ပွန်းက ဇနီးအား ကွာချင်တိုင်းကွာ၊ ပြန်ပေါင်းချင်တိုင်း ပြန်ပေါင်း မလုပ်ရန် ဇနီးဖြစ်သူ မိန်းမသားတို့ဘက်က ရပ်တည်ပေးထားသည့် အမျိုးသမီးအခွင့်အရေး ဥပဒေဖြစ်သည်။ ဟလာလဟ်သည် ခင်ပွန်းဖြစ်သူ ယောက်ျားသားများအား ပြစ်ဒဏ်ခတ်သည့် သတိပေး ဥပဒေဖြစ်သည်။ ကွာရှင်းမှု သုံးကြိမ်ပြုလိုက်လျှင် ထိုအမျိုးသားနှင့် အမျိုးသမီးသည် ရာသက်ပန် ထိမ်းမြားခွင့်မရှိသူ ဖြစ်သွားသည်။ ဟလာလဟ်အခြေအနေတခုကို ဖြတ်သန်းကုန်ဆုံးပြီးမှ ထိုနှစ်ဦးသည် ထိမ်းမြားခွင့်ရှိသူ ပြန်ဖြစ်မည်။ အမျိုးသမီးက တခြားအိမ်ထောင်ဖက်ကို ရွေးချယ်ပြီး ရာသက်ပန် ထိုသူနှင့် ဘ၀တည်ဆောက်သွားလျှင်သော်လည်းကောင်း၊ ဘယ်သူ့မှမယူဘဲ တစ်ကိုယ်တည်း ဘဝရပ်တည်သွားလျှင်သော်လည်းကောင်း ထိုသုံးကြိမ်ကွာရှင်းလိုက်သည့်အမျိုးသားအဖို့ ပြန်လက်ထပ်လိုလျှင်လည်း ဘယ်တော့မှ ရမည်မဟုတ်ပါ။ မျှော်လင့်စောင့်စား မျက်ရည်များဖြင့်သာ ဘ၀ကုန်ဆုံးရန်သာ ရှိပါတော့သည်။)
သို့သော် ကျွန်တော်တို့ တွေ့မြင်နေရသည်မှာ အမျိုးသားက မနစ်နာပဲ အမျိုးသမီးက နစ်နာသည်ဟု ယူဆကြောင်းကို တွေ့ရသည်။ ထိုသို့ဖြစ်ရသည်မှာ အိစ္စလာမ့်၏ ပြဌာန်းမှု အားနည်းခြင်းကြောင့် မဟုတ်ဘဲ ကျွန်တော်တို့အားလုံး အိစ္စလာမ်၏ အမိန့်များကို အပြည့်အဝမလိုက်နာသည့် အတွက်ကြောင့် ဖြစ်သည်။ အိစ္စလာမ်သည် ဟလာလဟ်နှင့် သွလားက်အတွက် ဥပဒေပြဌာန်းထားသလို နေကာဟ် ထိမ်းမြားမှုဆိုင်ရာ ဥပဒေများကိုလည်း အပြည့်အဝပြဌာန်းထားသည်။ နေကာဟ်တွင် အမျိုးသားတို့အတွက် အမျိုးသမီးတစ်ဦးထက်သာပို၍ ၄ ဦးအထိ ထိမ်းမြားပိုင်ခွင့်ရှိသည်။ အရင်ခေတ်အခါ အချိန်ကာလက အမျိုးသားတစ်ဦးက အမျိုးသမီးတစ်ဦးထက်သာပို၍ ထိမ်းမြားခြင်းကို အပြစ်ဟုမယူဆသလို အိမ်ထောင်ကွဲနှင့် မုဆိုးမအား ထိမ်းမြားခြင်းကို အပြစ်ဟုမယူဆသည့်အပြင် အချို့အချိန်အခါ၌ မြင့်မြတ်သည့် လုပ်ရပ်ဟု မှတ်ယူပြသည်။
အကယ်၍ အမျိုးသမီးတစ်ဦး အိမ်ထောင်ကွဲသွားလျှင် သို့မဟုတ် မုဆိုးမ ဖြစ်လျှင် အိဒ်ဒသ်စောင့်ဆိုင်း ကာလပြီးသည်နှင့် ကမ်းလှမ်းသူများ အများအပြားရှိသည်။ တနည်းဆိုရသော် အမျိုးသမီးအဆင့်အတန်းသည် မြင့်သည်။ထို့ကြောင့် ကိုယ်တော်မြတ် ဆွလ္လလ္လာဟို့အလိုင်ဟေ့ဝစလ္လမ် နှင့် ဆွဟာဗာဟ် သာဝကကြီးများသည် အိမ်ထောင်ကွဲနှင့် မုဆိုးမ အမြောက်များအား ထိမ်းမြားထားသည်ကို သမိုင်းစာပေများ၌ တွေ့ရမည်။ အမျိုးသမီး၏ အဆင့်အတန်း မြင့်မားသည် ပတ်၀န်းကျင်နှင့် တစ်ဦးထက်ပို၍ ၄ ယောက်အထိ ထိမ်းမြားခွင့်ရှိသည့် ပတ်ဝန်းကျင်တွင် လင်ယောက်ျားတို့က စည်းကမ်းမဲ့ သွလားက်ပေး ကွာရှင်းမှု မပြုရဲကြပေ။
သွလားက်ပေးကွာရှင်း လိုက်လျှင် တန်ဖိုးရှိသည့် ဇနီးရတနာသည် မိမိထံမှလက်မဲ့ ဖြစ်ရမည်။ အဆုံးရှုံးခံရမည်။
အကယ်၍  ကိုယ်က ပြန်ပေါင်းလိုလျှင် အခြားတစ်ဦးကွာရှင်းပေးပြီး ဇနီးဘက်မှ ပြန်ပေါင်းလိုစိတ်ရှိမှ ပြန်ပေါင်းရမည်ဖြစ်သည်။ ထိုအခြေနေမျိုးတွင် လင်ယောက်ျားဘက်မှ မိမိဇနီးအား စည်းမဲ့ကမ်းမဲ့ သွလားက်ပေးရဲမည်လာဟု ကျွန်တော်တို့ သုံးသပ်နိုင်သည်။
ဒါပေမဲ့ ကျွန်တော်တို့က သွလားက် ကွားရှင်းမှုစနစ်ကို အိစ္စလာမ်မှယူထားပြီး နေကာဟ်ထိမ်းမြားမှုစနစ်ကို တစ်လင် တစ်မယားစနစ်ဖြင့် အခြားဥပဒေမှ ယူထားသည်။ မိမိကိုယ်တိုင်က အမျိုးသမီးတဦးထက်ပို၍ လက်ထပ်ယူခြင်းအား နှာခေါင်းရှုံ့သည့် ပတ်ဝန်းကျင်ပြုထားသောကြောင့် သွလားက် ကွာရှင်းမှုကိစ္စနှင့် ဟလာလဟ် ကိစ္စရပ်တွင် အမျိုးသမီး နစ်နာနေသည်ဟု ထင်မှတ်နေကြသည်။ တကယ်တော့ အိစ္စလာမ့် ပြဌာန်းမှု အားနည်းသည့် အတွက်ကြောင့် မဟုတ်ဘဲ ကျွန်တော်တို့ ပတ်ဝန်းကျင် လူထုမှ အိစ္စလာမ့် ပြဌာန်းမှုများအပေါ် အပြည့်အဝ မလိုက်နာပဲ ဟိုတစ်စ ဒီတစ်စလိုက်နာခြင်း၊ စိတ်နှင့်တိုက်ဆိုင်လျှင် လိုက်နာ၍ စိတ်နှင့် မတိုက်ဆိုင်လျှင် နှာခေါင်းရှုံ့သည့် အတွက်ကြောင့် အစ္စလာမ့်ဥပဒေများကို အလိုမကျ ဖြစ်နေခြင်း ဖြစ်သည်။ တကယ်တော့ ဟလာလဟ်သည် အမျိုးသမီးအခွင့်အရေး၊ အမျိုးသမီး လွတ်လပ်ခွင့်၊ အမျိုးသမီး၏ ရွေးချယ်မှုပင် ဖြစ်ပါသည်။

ရေးသူ မုဖ်သီမုဟမ္မဒ်အိဒ်ရီးစ်ဆွာဟိဗ် (Idris Nct)
အလ်မုဖီးဒ်
ဟစ်ဂျရီ ၁၄၄၀၊ မုဟရ်ရမ် ၁။
12/9/2018 (ဗုဒ္ဓဟူး)